Mánáidgárdesadji

Gielddas lea geatnegasvuohta fuolahit dán bálvalusa.

Gielda galgá lágidit ovttastahtton sisaváldinproseassa ja dásseárvosaččat meannudit mánáid ja maiddái almmolaš ja priváhta mánáidgárddiid. Mánáidgárdesaji ohcama galgá deavdit sierra skovvái mii lea oktasaš buot mánáidgárddiide. Juohke máná nammii galggat sáddet sierra skovi.

Bija ohcama mielde cealkámuša áššedovdi ossodagas jos mánás lea vuoigatvuohta vuoruhuvvot.

Mánáidgárdesaji juolludeapmi galgá dáhpáhuvvat mearriduvvon sisaváldineavttuid vuođul. Du sávaldagat ja dárbbut galget sakka váldot vuhtii sisaváldimis. Jahkásaš váldosisaváldima oktavuođas galget čálalaččat dutnje dieđihit leat go ožžon saji ja man mánáidgárdái leat fállan saji. Jos it leat fidnen vuosttas sávaldahkii saji, de lea dus vuoigatvuohta biddjot ohccilistui dán mánáidgárdái.

Lassi sisaváldimiid oktavuođas mánáidgárdejagis muđui galget ovddimusat fállat sajiid ohcciide ohccilisttus, mearriduvvon sisaváldineavttuid vuođul. Juolludeapmi galgá leat čálalaččat. Daid ohcciid gaskkas geat eai oaččo saji lassi sisaváldimiid oktavuođas, galget beare sii geain lea vuoigatvuohta vuoruhuvvot oažžut dieđu das ahte saji leat fállan earáide.

Jos it fidne saji vuosttas dahje nuppi mánáidgárdde sávaldahkii, de sáhtát dáhttut čálalaš vuođuštusa.  

Jos váldosisaváldima oktavuođas hilgot du mánáidgárdeohcama, de sáhtát guoddalit mearrádusa. Sáhtát maiddái guoddalit, jos ii goabbáge du vuosttaš dahje nuppi sávaldagas ollašuvvo. Lassi sisaváldima oktavuođas sáhttet beare sii geain lea vuoruhuvvon vuoigatvuohta, guoddalit mearrádusa. Guoddalanáigemearri lea dábálaččat golbma vahku das rájes go ožžot mearrádusa. Guoddaleami sáddet dan instánsii gos mearrádusa leat dahkan.    

Jos gielda gávnnaha ahte du mánnái livččii galgan fállat sávvan saji, de galgá sutnje fállat dan vuosttas guoros saji mii báhcá maŋŋá go mánát geat lága bokte leat vuoruhuvvon, leat ožžon fálaldaga sajiide. Jos it oaččo veajiheami, manná ášši viidáset gieldda guoddalanlávdegoddái, mii lea guoddalaneiseváldi.